Ivo I

Vandaag is ’t den 13e september, 28 grade en ’t zjwömbad op 50 maeter aafsjtand.
Veur alle dudelikheid, ich bèn noe in Sjpanje op vekansie same met Monique.
2018 Ivo I

Of baeter gezag, op “traeningskamp”. ’t Geuf mich de rös òm alles wat d’r al geregeld is, de eesjte emosies, belaevinge, stress en wat meer, op ein rie te zètte.

Degene die mich al get langer kènne, weite dat ich in 1994, nao ein jaor stage ònger
Frank I, lid van de Doorzètters bèn gewoorde en geliek ’t sikkertariaat van Jan Tummers höb euvergenòmme.
15 Jaor lank de kòmbinasie van Doorzètters, Klosterzaler, handjbal bie BFC es sjpeler en traener en natuurlik mien gezin welke in de töschetied kòmpleet woort met mien dochters Milou en Anik, later allebeits jeugprinses. Daonaeve de aktieve naobersjap.
De laeftied en den drang òm nog volsjtendig te kènne sjporte, zörgde veur ein aafsjied van ’t kestuum mer wat bleef waor ’t werme hart veur de Doorzètters. ’t Geveul veur ein hel wirkende klub. De mäögelikheid òm eine of meer aovende plezeer te höbbe en de rès ins effe te kènne vergaete. Of waor ‘t ’t geveul òm op de buun te maoge staon. Angesj dan met de Klosterzaler destieds. .Nei, veurop te maoge loupe en de luuj oet ’t dörp met te numme. Dat geveul of verlange waor d’r al jaore mer woort ummer sjterker.

Väöl luuj vroogte mich: “enne, wurts doe gein prins? Spietig, meh eder jaor zo ròndj oktober wis ich dat d’r weer eine angere geweldenaer gevraog waor. Pès meert 2017.
Inmiddels weer toegetraoje pès ’t besjtuur ès penningmeister mer bewus neet in de Raod. Opvolger van Wim Fölker, eine van mien maatjes oet miene eesjte perjode bie de Raod en de Klosterzaler.

De gelaegenheid wobie ich gevraog woort, waor ein emotionele biejeinkòms mer de grote zin kaom van vorst Rob: “wie zit ’t met Jan de 16e????” Ein moment wo Rob neet in hauw veurzeen en ich zeker neet mer mien antjwoord waor tösche alle emoties door dudelik: gaon VEER doon, mich realizerend dat Monique neet bie ’t gesjprek aanwezig waor…

Gesjprekke volgde met Patrick de Klerk, Rob Hofkamp en later op geheime lokaties met Ger Bouchez. Òngerwerpe wie dreijbook, relasie penningmeister-prins-handjbal, en gank zo mer wiejer. Ich dach ’t alleneij al te weite mer wat verzèt de prinsekemissie ein werk op de achtergroondj. Sjpannende tieje, kleijer, fotoos, medaaljes, koffie klatsje, tillefoon neet meer oetlene veur de geheim berichte, kòmpjoeter aafsjerme, kènjer òm de gaard leije, neutraal blieve in de vergaderinge met de Raod en veural ouch mien rol tiedes AOVENDJE BFC opvange.

Ederein noe alvas bedank die dèks op ’t lètste moment veur ’t blok woorte gezat en toch alles regelden oeteindelik.

’t Korte sezoen is, es geer dat laest al wiet op gank. Toch wil ich uch vraoge om SAME de karnaval te viere met mich. Laot mich weite wat d’r sjpeelt, vier ’t bènne de regels van gezèlligheid en veiligheid, kòm nao de optochte mer veural VIER karnaval.

Handjbal en karnaval zit in mien blood
’t gael en greun kump eindelik bie ’t rood
Zèt de zörg dus noe aan de kantj
en pak mich bie de handj
Dan num ich uch met door ’t vastelaoves landj

Prins Ivo I

Wie is online

We hebben 25 gasten en geen leden online